Bibi Fathima zehra a.s ki kahani

 Bibi Fathima Zehra ki kahani

Ek mashoor reewayat hai ke arab ke kissi shehair me ek Sunaaran rehti thi jis ka sirf ek ladka tha. Ek roz jab Sunaaran kuaen par paani bharne gayee to Ooska ladka bhi uske peeche holia. Sunaaran ladke ko kuaen ke khareeb bithaakar paani bharne lagee. Kuaen ke dusaree taraf ek kumhaar rehta tha jis ki bhatti oos waqt khoob daihak rahee thi. Ladka khelte khelte oos taraf nikal gaya. Sunaaran jab paani bharchooki to kuaen ke khareeb ladke ko na paaker khayaal kiya ke ghar chalaa gaya hoga. Waapis ghar pahunchee to wo waha bhi nahi mila. Maa badii pareshaan huwi. Roti peet thi apne lakthe jigar ki talaash me doobara ghar se niklee. Kuaen ke khareeb aayee. Jagah jagah dhoonda. Sargardaan aur pareshaan phirtee rahi. Har ek se pooncha magar koi suraag na mila. Is tarha shaam ho gayi. Yakayak shor hua ke sunaaran ka ladka kumhaar ki bhatti me gir kay jall gaya hai. Ye sunkar sunaaran ko intehayee sadma hua aur iss qadar royi ke oosay ghash aagaya.

Alam-e-ghashee me kya dekhti hai ke ek mozamma naqaab posh tashreef layee hai aur farma rahi hai ke ghum na kha. Tera beta bahut jald tujhse milega. Tu niya'at kar le ke agar mera beta kumhaar ke bhatti me se zinda khelta khoodta nikal aaye to main jaanab-e-Sayyeda(s.a) ki kahani sunoongi. Sunaaran ne fauran alaam-e-ghashee me hi niya'at karke mannat maan lee. Jab sunaaran ki aankh khulee to waqai sunaaran ne dekha ke ladka khuda ke fazal-o-karam se hansta khailta zinda salaamat chalaa aaraha hai aur Ejaz-e-Janaab-e-Sayyada (S.A.). Say uss ke jism par aag ne koi asr nahee kiya. Yahan tak ke lebaas-badan tak mehfooz raha.

Allah humma salle alaa muhammadin wa ale muhammad.wajil farajahu

Sunaaran bache ko lekar khushee bazaar gayee aur do paise ke sheerne khareedi aur padausiyon se kaha meree murad puri hui hai. Mere ghar chalkar janaab-e-Sayyeda(s.a) ki kahani mujhe sunaado. Chey saath gharo me phiri lekin har ek ne yahee jawab diya ke na hame kahani yaad hai aur na humko itnee fursat hai ke fazool baaton ki taraf tawajey dein. Sunaaran maayus hokar jungle ki taraf chaldee. Kuch door chalkar wohee naqab posh Mozamma nazar aayee aur farmaya ke "Ay khatoon mat ro. Chadar bicha ke baith jaa. Mai kahani sunati hu'n tum suno. phir aap ne farmaya ke sheher madina me ek yahudi rahta tha. Us ki ladki ki shadi thi. Isliye woh yahudi janaab Rasool-e-khuda(S.A.W) ki khidmat me aaya aur kehne laga ke mere ladki ki shadi hai. Aap ijazat dein to main sharf paaon ke Janaab-e-Sayyeda (s.a) mere ghar tashreef le chale'n. Aap ne farmaya ke iss amr ke maalik janab Ali(A.s) hai. Ye sunkar wo Hazrat Ali (a.s) ki khidmat me hazar hua aur arz kiya ke aap aap ijazat dein to Janaab-e-Sayyeda (s.a) mere ghar tashreef le chalein . Aap ne farmaya ke iss amr ki maalik khud Jaanab-e-Sayyeda(s.a) hai. Iss ke baad wo yahudi Janaab-e-Sayyeda(s.a) ke darwaze per aaya aur awaaz dee ke ay Bint-e-Rasool meri ladki ki shadi hai. Agar aap tashreef le chalein to meri bohatt izzat afzaai hogi. Aap ne farmaya ke Janaab-e-Ameer (A.S) se ijaazat le loon to chaloon. Yahudi ne arz kiya ke main Rasool-e-Khuda (saleh-ala-waley-wa sallum) aur Sher-e-khuda Hazarat Ali (A.S) ki khidmat me gaya tha. Sub ne aap hi ko mukhtar kiya hai. Janab-e-Sayyeda(A.S) yeh soonkar mutaffakar ho gayee. Itne me Janaab Risalat-maab Janaab Rasool-e-khuda (saleh-ala-waley-wa sallum) khud tashreef le aaye. Janaab-e-Sayyeda(s.a) ne farmaya ke yahudi ke ghar se aadmi aaya hai aap kya farmaate hai iss ke ghar jaaoon ke naheen. Aap ne Farmaya ke beti iss ka ikhtiyar khud tumko hai. Janaab-e-Sayyeda(a.s) ne phir farmaya ke baba jaan aap ki sakht toheen hogee ke mere paas wohi phate poorane kapde hai jisme ja bajja khurmoon ke peywand lage howe hai. Rasool-e-Khuda (A.S) ne farmaya ke beti issi haalat me jaao. Jo marzi mabood. Chunachey jaanab-e-Sayyeda(a.s) jaane ko tayyar ho gayeen. Apne darwaze tak na pahunchee thi ke hooraan-e-Jannat Aasman se naazil huwe aur janaab-e-Sayyeda(A.S) ko zewraat aur khilatt-e-jannah se aarasta kiya aur apna jaloos lekar rawaan huwe. Is shaan se janab-e-Sayyada(a.s) ki sawaari yahudi ke ghar pahunchi. Jounhee Aap yahudi ke makaan mein dakhil huwi tamaam makaan aapke noor se roshan hogaya aur aisee khushboo phailee ke door door tak mahsoos hone lagi . Ye tajammul aur waqar dekh kar tamaam yahudi aurtein behosh hogayi. Thorree der baad sub ko hosh aaya magar dulhan ko hosh nahi aaya. Laakh tudbeerain kein magar sub baisood huwe. Dekha gaya to maloom huwa ke rooh aaroos qafus-e-ansaari se parwaz kar chuki hai. Annan-fannun mein khana-e-shaadi matum zada bungaya. Janaab-e-Sayyada(a.s) ko ye dekh kar bohatt tashveesh huvi aur aap ne farmaya ke itminaan rakhoo abhi hosh aajayega. Iske baad aap ne do rakaat namaz padkar dua farmaayi aur kaha ke ay mere mabood main Bint-e-Rasool (A.S) hoon: 

Siddiqa naam rakha hai apne Batool ka

Jhoota na kijeo mujhe sadqa Rasool ka

Ay mere mabood-e-Barhaq: main aapke Rasool ki beti hoon. Meri izzat aapke haath me hai. Tamaam logh yeh hi kaheinge ke sayyada(a.s) ke aate hi dulhan khatum hogayee aur khana-e-Shadi khana-e-ghum bangaya. Kuch der na ghuzree thee ke aapki dua qabool huyi aur Dulhan kalma-e-Shahaadat padte huwe uth baithi.

Allah Humma Salle alaa mohammadin wa ale mohammad.

Aur kehne lagi ke main shahadat deti hu ke khuda wahdat-la-shareek hai

Aur Hazrat mohammad mustafa(s.a.w) barhaq hai aur aap inki sahabzaadi hai. Aap mujhe mazhab-e-islaam ki taleem farmayen. Aur is tarha dulhan musalmaan hogayi. Jaanab Fathima Zehra (a.s) ka yeh Ejaaz dekh kar paansaw yahudi mard aur auratein bhi musalmaan hogay. Aur Aap ko sab ne nehaayat izzat aur ahteraam ke saath rukhsat kiya. Ek aurat aapke kaneezi me dee. Aap ne apne daulat khane par tashreef laakar tamaam maajra janab-e-Rasool khuda (s.a.w) se bayaan kiya. Risaalat maab Hazarat Mohammad (A.S) ne bhi khuda ka shuker Adaa kiya.

Kahani ka pehla hissa khatam huwa. Mozamma ne doosra hissa shuroo kiya. Sunaaran nehaayat aur dilchuspee se suntee rahee.

DOOSRA HISSA 

Kisee sheher me ek badshaah rahta tha. Us ne apne wazir se kahan ke Saamaan-e-Shikaar tayyar karo. Wazir ne Saamaan-e-Shikaar tayyar kiya aur baadshaah ko khabar dee. Baadshah shikaar ko chaldia. Shehzaadi aur wazirzaadi dono ladkiya bhi saath theen. Chalte chalte ek jungle me pahunche. Khaimein nasab kiye gaye. Lashkar waale thakawat door karne ke liye lete. Kuch logon ne naashta kiya itne me itnee zor ki aandhi chalee ke sab log udgaye. Shahzaadi aur wazirzaadi ek pahad par jaaker gire'en. Aandhi band hone ke baad rafta rafta tamaam log jama hogaye . Aur tamaam lashkar laut aaya. Magar ladkiyo ka koyi pataa na chalaa. Baadshah aur wazir ne bahoot dhoonda aur sarganda phire magar kahi bhi ladkiyon ka pataa nahi mila. Sab majboor hokar wapis aagaye. Itafaqan unke wapis jaane ke baad kisee doosre mulk ka badshah issi jungle mein shikaar khelne ke liye aaya aur apne wazir ko hukum diya ke paani talaash karke laaye. Wazir pani ki talaash mein itefaqan ussi pahad par pahunch gaya jahan par dono ladkiyan thi.

Ye ladkiya apne waaldayn se beechar kar itna royee ke dono ko gush aagaya. Aalam-e-gushi me in ladkoyo ne dekha ke ek niqab posh mozamma tashreef layee hai aur farmarahi hai ke ay ladkiyo tum mannut maan lo ke jab tum waldain se mill jaao gi toh jaanab-e-Sayyeda(a.s) ki kahani sunungi. Inn ladkiyone alaam-e-ghashee me yeh mannat maan lee. Jub hosh aaya to ek doosre ne iss waqiya ki tasdeeq ki. Itne me wazir paani ki talaash me gaya aur dono ladkiyo ko dekh kar bahut hairaan huwa. Wazir aur baadshah ne dono ladkiyo ko saath aane ko kaha. Chand rooz ladkiyaan badshah ke yaha raheen. Phir badshah ne in ladkiyoun ke waaldain ko itallah dee. Ladkiyon ke waldain ne fauran khat likhker unko wapis bulwaya. Iss doosre badshah ne arz ki ke aapki ladkiya hazir hain magar kya ye acha ho ke badsha ki ladki ki shadi uske bete aur wazir ki ladki ki shadi wazir ke ladke se ho jaye. Phaile badshah ne ye baath manzoor karlee. Doosre badshah ne dono ladkiyon ko ruksat kardiaa aur ladkiyaan apne waledain se milkar bahut hi khush huin.

Dono ladkiyan ki shaadi hogayi aur dono ladkiyan dulhan bankar susraal chaleen. Itefaqan ek dulhan ka lotta jo jehez me mila tha waheen reh gaya. Ek sipahee ko wapis rawana kiya ke lotta le aaye. Seepahee waha gaya to kya dekhta hai ke jahan par ladkiyon ke baap ka mahal tha wahaan maidaan hai aur ussi maidaan me lotta rakhaa hai. Jab sipahee ne lotta otthana chahaa, iss lotte me se ek saamp ne phanna nikala. Seepahee uchchal kar peeche hat gaya. Seepahee ne bahut chaaha ke lotta uthah sake lekin mumkin na ho saka. Majbooran wo seepahee wapis aaya aur sub ko ye maajra sunaaya. Badshah ko ye sunkar bohat hairat huyi aur wo dulhaano ke pass aaya aur kaha ke maloom hota hai ke tum dono jadugar ho. Is waqt main tumko qaid karta hu aur subha ko qatal kara dunga.

Jab dono ladkiyon ne ye suna to lipatkar khoob royi aur behoosh hogayi. Halat behooshi me dekha ke wohee pak naqaab posh mauzamma jo pahad par nazar aayi thi phir tashreef layi aur farmane lagi ke Ay ladkiyo tumne mannat maani thi ke jab tum apne waldain se milogi to janaab-e-Sayyada(a.s) ki kahani sunogi . Tum logo ne kahani nahi suni. Yeh bud ahdi hai. Issi wajah se ye azaab nazil huwa hai. Ab tum log issi qaid khane me kahani sunoo.

Ladkiyo ne kahan ke qaid-khane me humare paas paise kahan hain. Apne farmaya ke tumhare aanchal me do paise bundhey hai. Ladkiya jab hosh me  aayi to kia dekha ke waqai inke anchal me do paise bandeh they. Ab inhon ne kisi tudbeer se do paiso ki meetthaee mangayee aur ek ladkee ne kahani kahee aur doosri ne suni. 

Subha ko jab jalaad in ladkiyo ko qatal karne ke liye aaya to inn dono ne uss se kaha ke pehle hum badshah se kuch arz karna chahte hai. Jab badshah inke pass tashreef laaya to inn dono ne apne henna aalood haath band kar kaha ke ek aadmi hummare makaan par bhej dijiye phir aapki jo marzi hogi wo kijiye ga. Badshah ne yeh manzoor kiya aur ek seepahee ko rawaana kiya. Seepahi ne jaakar jo dekha wo hairaan rah gaya. Wahan par sab kuch maujood tha , mahal, takht-o-taj sab kuch salamat thaa.

Baadshaah ladkiyo ke pass gaya aur daryaft kiya ke ye kya maajra hai ladkiyun ne badshah ko sab majra bataya. Badsha ne dil se iss maujuze par yaqeen kiya aur fauran huqum diya ke dono ladkiyo ko ba izzat aur ahtaram ke saath ke saath riha kiya jaaye aur mahal ponchaaya jaye.

YE KAHANI SUNARAN SE KEHKAR JANAB-E-SAYYADA(A.S) ROOPOSH HO GAYEEN. 

Sunaaran jab apne ghar wapis aayi to kya dekhti hai ke jin logo ne kahani sunne aur sunaane se inkaar kiya tha aur mazaalah fazool sumjah tha, unke gharon me aag lag gayi thi. 

JIS TARRAH SUNNARAN KI MURAAD PURI HUI, KHUDA-WAN-DE-ALAM (Bahuq-e-janaab Sayyada Fathima A.S.) HUM SAB SUNNE WAALON KI MURAADE PURI KARAIN; Ameen-summa-ameem